بواسطة , 25-01-2022 عند 01:41 PM (20342 المشاهدات)
![اقتباس](images/teal/misc/quote_icon.png)
المشاركة الأصلية كتبت بواسطة نبيل سعيد مصيلحي
دا احنا والله غلابه طحن ..!!
ـــــــــــــــــــــــــ ــــــــــــــــــ
شعر / نبيل مصيلحي
ــ
إمتى نكسر ألف قُله
يوم ما تمشي
يوم ما تخفي عن وجودنا يا ( كورونا )
كان وجودك سجن أكبر من خيالنا
قام وخدنا بره أسوار الوجود
للفزع والوحشه وانكسارات الخواطر
كنتي مأتم لمّه فيه كل الحزانا للعزا
كنتي أكبر صدمه لينا
دهشه حفرت في عقولنا
كل ألوان التساؤل
هيَّه إيه الدنيا .. خلصِت
والقيامه ع البيبان ..!!
بتدق تعلن عن رحيلنا
هوَّه إيه .. مش هنفرح بالعيال
ونجوز البنتين بناتنا ..!!
دا أملنا كبير قوي في الإله
إن نبقى زي ما احنا
بين عيالنا طيبين
حتى نفرح بالحفايد..!!
الدموع سالت على الخدين حنين
دا احنا والله غلابه طحن
عمرنا بنلم حالنا
حبَّه مُر وحبَّه حلو
أصل همَّه يومين ومكتوب ع الجبين
مهما طال بينا الزمن مروحين
بس والله اللي حازز جوَّه نفسي
الكعبه فاضيه ومسجد الله الحرام
والمسجد النبوي الشريف
حتى المساجد عندنا نفس الخلا
والصلا عاد في البيوت
واللي مات في التُرب صلوا عليه
جايز يكون غضب الإله ..!!
للي مش عارفين لهم رب وإله
مات قلوبهم جوَّه منهم
مات ضميرهم في توابيت الأنا
باتوا أموات الحياه .. عاشوا أحياء العدم
ظنوا إن الأرض ليهم
طلعوا فوق سطح الفضا
ظنوا إن الأمر هيِّن
زيِّنوا الأرض بآمالهم
زخرفوها بحلمهم
شافوا إن القوه تكسب
كان سباقهم ع السلاح
والجنون إيد ع الزناد
موت هنا على موت هناك
الظلم ساد .........!!
مات الورود جوَّه بستان الحياه
نسيوا إن الرب قادر فوق حروبهم
وان جُنده فوق جنود الشر أقوى
نسيوا إن الأمر أمره ..!!
لمَّا يؤمر " كُن " يكون
بالصواعق والأعاصير والحرايق
والسيول تاخد قصادها أي شئ
والزلازل واهتزازات النفوس
واللي ما بنقدر نشوفه م الكورونا
والأبولا وسارس واكتر
والرياح
كل جند الله نصيرُه
ما يُقف قدامها غالب ..!!
شوفوا فيروس أربك العالم في حيره
راح ملايين من قصاده
تعمل إيه أم الصواريخ والبوارج
تعمل إيه أم القنابل والمدافع
تعمل إيه التكنولوجيا والنواوي
تموت بلاد كانت بلاد
يا رب ارفع عننا سوء البلاء والوباء
ــ
الكلمات الدلالية (Tags):
لا يوجد
- التصانيف
-
غير مصنف