المشاركة الأصلية كتبت بواسطة مصطفى عمار
يعني ايه كلمة (حضارة)
كان زمان فـ شارعنا واحد ... اسمه عمو وليد حضارة
الجمال والنور في وشه ... لو تشوفه يغض رمشه ... زي عصفور جوا عشه
كنت بلمح فيه راءة ... والطفولة طاقة طاقة
رغم انه كان معلق فوق كتافه ... نسر أصفر عمر حد ما كان يخافه
والفضول اللي في دمي ... خلا هم يزيد في همي
روحت أسأل مين وليد
قالوا دا دلوقت رائد ... بس كان من كام سنة ظابط اشارة
*****
السنين مرت بتجري ... والكتاب محطوط فـ حجري
بقلب الصفحة وبذاكر ... ألقى درس اسمه الحضارة
قولت لأ دا الكلمة لغز ... لازم اعرف يعني ايه كلمة حضارة
*****
قالوا إسأل في التاريخ
التاريخ قالي الحضارة ... هيا مجموعة حجارة ... رصصوها خوف وخفرع
الحضارة في التابوت... والفراعنة حنطوها
المقابر صنعوها من الرخام بالدهب بيزينوها
هو دا معنى الحضارة
*****
روحت أسأل عم صالح ... هو فلاح بس ناصح
الزراعة كل عمره ..والزراعة دي شطارة
قولتله يا عم صالح ... يعني ايه كلمة حضارة
قاللي يابني ... كنا فـ الأول بنزرع كل موسم له شهورة
بالجنيه نزرع ونقلع والبهايم كات بتشبع
والحمار ويا الحمارة جوا شارع كل حارة
واما جم قالو الحضارة
قالوا تلفزيون بلمبة ... والمتورقوى الطرمبه
والصوبات ويا التقاوي ... خلت الخسة كرمبة
والعبارة في الشكارة ... هو دا معنى الحضارة
*****
روحت يوم الجامعة بدري ... والدموع ع القلب تجري
قولت هسأل كل شاب يعني ايه كلمه حضارة
شاب قالي : ياه يا صاحبي حاجه تايها ولقيناها
الحضارة فـ السجارة
والسجارة لفه بيضه ألف نوع وبألف اسم
والحشيش موضه قديمه والجديد دلوقتي بانجو فيها ايه اما تشم
الدماغ كبر ياعم ... واللي يتكلم بنفض
أحلى حاجه تعيش مروشن ... القميص يبقى قصير ... والشراب بقه نص كم
هو دا معنى الحضارة
*****
وفى النهايه
الحضارة مش حجارة ... الحضارة مش شكارة
الحضارة مش سجارة
الحضارة : نيل بيجري من السودان ولحد مصر
شايل الخير فوق كتافه
والجمال فعيون ضفافه
اللي خلا ابهتنا من زمان يعملوا من الرمل قصر
الحضارة فـ حبنا لنيلك يا مصر