يا طيرى إنت غراب؟
والا إنت حداية؟
والا انت بس سراب
من لحنى وغنايا؟
ياطيرى فين الريش؟
ورينى فين العش!
صارحنى ماتخبيش
إياك تكون بتغش
ده الغش ده آفة
منسوجة حواليا
بالقوة تتعافى
وبتلوى ف إيديا
وأنا م الألم بأصرخ
يا صرخة ماتسافرى
ده أنا م الألم هأشرخ
الصخرة بضوافرى
ياطيرى قول يا طير
هو إنت مش طيرى؟
طب ليه تروح للغير
ومعاك يروح خيرى؟
سامعك يا طير بتقول
إنى نسيت لأى
وإنى أنا المسئول
لو سبت يوم حقى