السلام عليكم ورحمة الله وبركاته
الله عليكِ يا أستاذتنا
كلمات من بطن الواقع المرير الذي يحياه كل الشعب المصري
في ظل خصخصة(( الهواء وضوء الشمس والقمر))
حسبنا الله ونعم الوكيل .... بس بردو العيب في الشعب إنه سكت
ورضي إنّه يكون عبد للقمة العيش ومتقسم - في رأيي - زي مقلت قبل كدا
ف جزء من قصيدة ليا قديمة إرتجاليه في موقف معين عن شعبنا الغالي ...
شعبنا مقسوم تلاته
تلت وكلاه البرومه
وتلت زلّاه الحكومه
وتلت مش قيماله قومه
اصله واخد ع التباته
إللي ياكل جبنه تركي
ولّا جبنه دانيمركي
مين هيسمع لمّا نشكي
قضيناها بالشحاته
قضيناها نوم فـ نوم
غرقانين وسط الهموم
إمتى فينا ضمير يقوم
يحيا تاني من مماته ؟؟
إمتى ييجي قسم رابع
يصحى ويجمّع رفاته
........
بس إن شاء الله هييجي ...
قصيدتك طبعا روعة بس أخوكِ ليه رأي
صغير بس ياريت متزعليش منّي فيه
ياريت تخلي مده بين رفع كل قصيدة والتانيه
عشان تاخد وقتها من النقد والقراءة وعشان احنا منقدرش
على كل الجمال دا مره واحده بردو ...
وبصراحة ... أنا سعيد جدا بانضمامك للواحه لإن عن رأيي
إنّك أحييتي قسم العامية بعد شبه موته ....
ومعلش للإطاله ومتابع دائم بإذن الله
محبتي ووافر موتي