قبل ما أفكر أخونك
اقتلينى
وادبحينى
عيشينى فى ضلمة قاتلة
وابعدينى عن عيونك
نفّذى فيا عقابك
عذبينى
واقتلى قلبى اللى سابك
وف عذابك عيشنى
ومش هلومك
لبسينى بدلة حمرة
غمّى عينى
واسألينى ...
قبل ما تموت عايز إيه ؟
عارفة هطلب منك إيه ؟
هطلب إنك تقتلينى
إمتى وإزاى فين وليه ؟؟؟؟
مش مهم
الأهم ...
إن حكمك يبقى سارى وتعدمينى
ولا أقولك ...
كفينيى وعينى صاحية
وادفنينى بالتراب من كل ناحية
ولو صعبت عليكى لحظة
غمضى عينيكى وبرده ادفنينى
ولا اقولك ...
رأيك إيه لو تدبحينى ؟
برده لأ ؟
طب بلاش
هاتى حبل وكتفينى
وف بحورك الغريقة غرّقينى
اعملى فيا يا روحى ما بدالك
مش هعارضك
بس أبوس إيدك فى عرضك
كلمينى
حسسينى إنى عايش
أو بسرعة موّتينى
المهم تريحينى ...
إنتى ليا ؟
ولا قررتى تسيبينى ؟