الكنز
........
الكل واقف فى الطابور
مستنى دور
عشمان فى كنز من السما
مع موزَّة بيضه مقسمه
ولا حد فكَّـر . يوم يخضَّـر
نُص شبر ف أرض بور
واهو كله ثابت فى الطابور
.....
إصحا يا عم
إغضب وثور
ثور عالبطاله وعالتواكل
عاللى ناهب واللى واكل
واللى بانى بحق غيرة ، واللى بيمرجح ضميرة
لاجل ما يعلى القصور
.
إغضب وثور
.
مستنى إيه ؟
.
إياك يكون نَـفَـسَـك قصير
إوعاك تكون محتاج ضمير
وإياك تكون عايش عشان
تترقى من داعش أمير
.
واياك تصدق أى شاشه
لا حظيرة ولا تلفيق عفاشه
ولا أرزاقيه بألف وش
مش كل بدلة بتكسي باشا
إصحا ياعم
بَطَّــل مَلل
كَـسَّـر عكاكيز الشلل
ثور وانتفض . إزرع أمل
إرويه بعرقك والعمل
يطرح ببركة ربنا
والكنز يصبح محتمل
الكنز يصبح محتمل