كان نفسي اكون انسان

كان ياما كان
كان يوم زمان قررت فيه أكون إنسان
كان ياما كان
أبويا قالي زمان .... الحزن هو الفرح بس بوش تاني
والفرح مالوش طعم لو قبليه مافيش أحزان
الدنيا دنيا وكلنا بنعاني
لا تصاحب الناقص..
لا تصاحب الكداب...
واياك يا ولدي للخاين تدي الأمان

قالي تشوف بلاوي الناس تهون عليك بلواك
فتشت ف قلوب الخلايق على بلوه تضاهي بلوايَ

مالقيتش حزن ف قلب مخلوق إتخلق
يهون عليا أحزاني
عملت من صوت البكا ألحان
سمعوها قالو يستحيل دي تبقا ألحاني

كان ياما كان

الحزن ليلاتي يدق بأبي وافتحله
والفرح ولا زارني ولا شوفته ولا جاني
الدنيا دي محكمه, والمجني عليه هو أنا
وانا القاضي وانا الجاني
شربت كأس المر لأجل أنسى, نساني للأسف إني شربت, ف شربت تاني لأجل أنسى, ف تاني نساني, ف شربت تاني, ف نساني بشرب ليه, ف شربت تاني خلص الكاس, ولما فوقت عرفت إنه مانسانيش, لاكنه قسّاني

مع كل رعشه ف جسمي بعد البكا
خلت القلب حجر
قلبي اللي عاش يوفي, هان وانكسر
قلبي اللي حب وادى المحبه زمان, إنخان وهان
وكان ياما كان
كنت فاكر إني هاكبر وهاقدر وهاصبر وهاوصل
كان ياما كان.. كنت فاكر الحياه ألوان
كنت فاكر الصحاب بتصون وبتشتري وتبقى, وماعرفش ايه اللي حصل
تقريباً اللي حصل إني كبرت
للأسف كبرت
ولقيت إن المشكله مش ف انك تبيع صاحبك, وان المشكله ف إنك تبيعه بكام
وان الحب موجود وبنشوفه وبنعيشه وله أثر ملموس, ف الأفلام
كنت أسمع زمان, إن فلان طالب يد أخت فلان
دلوقت بسمع إن فلان إغتصب عرض فلان
وان كذا لما حس بالأذى وحس إنه إنهان
واجه فلان ف قام فلان قاتل فلان

يا دنيا أنا غضبان
بالله عليا عليكي لأعلن العصيان
ازاي قوليلي الندل فيكي حر والحر فيكي جبان
ازاي ماشوفتش فيكي حاجه تسر والمر مش بيمر والفرح مانشوفهوش ولو شوفناه تخطفه الأيام
ملعون لساني لما قال
عايز اعيش إنسان

وكان ياما كان
كان نفسي أكون إنسان

حرف تألق وزهى في نثرية جميلة طيبة الأداء
أنين قلب وعذوبة مشاعر وقول جميل طاب معنى ومبنى.
بقى أن أقول لك أن حتى هنا في قسم النثر يجب أن يكون النص باللغة العربية
سأترك نصك هنا كنوع من الترحيب بك وبقلمك ـ على أن تحاول مرة أخرى الكتابة بالفصحى.
لا تعرف كم يسعدني أن يتردد أسم الطنطاوي الحسيني مرة أخرى في الواحة
فأهلا بك ولك مني كل التحية والتقدير.