أعلان للسادة شعراء قاعة الادب الشعبى -- هام للغاية

الاستاذ احمد
انت شاعر ذات ملمح خاص
ولك تجربة شعرية سخية ازعم انى تعايشت معها بود وحميمية
كيف ترى حال الشعر العامى الان - والى اين تسيرحركته؟
تحياتى ولى عودة معك

أخي الحبيب أبودنيا
أولا اعتذر عن التأخير
وأنا معك الأن
سؤالك: كيف تري حال شعر العامية الأن؟
صراحة وعلي عكس رأي بعض الشعراء الكبار في شعر العامية
هم يقولون أنه يسير للخلف وانه في منعطف خطر
وأنا أقول لا
شعر العامية في احسن حال الأن ويعود هذا بالطبع لما يدور من حولنا ومن تعدد تجارب شعر العامية من اشكال وطرق وكتابات اري شعراء للعامية نفتخر بهم ونتباهي بما يكتبون محمد بهجت وماجد يوسف ومجدي نجيب وعلي رأس الجميع استاذنا ومعلمنا سيد حجاب
والحركة الشعرية العامية تسير نحو تشكيل وجداني مستقل بها
فيكفي مثلا ان تجد لشعر العامية المصرية محبون ومستمعون في باقي اقطارنا العربية وانا لامست هذا بنفسي اثناء زيارة لشاعرنا الكبير عبد الرحمن الابنودي للملكة السعودية ذات يوم
اجزم اخي ابودنيا
أن شعر العامية الحالي لقادر علي توحيد الصف العربي
فكما تعايش الناس مع عمنا فؤاد حداد وكنا في انكسار وهوان
لهو قادر علي توحيد مااتلفه غرور السياسات الكاذبة
**********************
تحياتي لك ولكل اعضاء المنتدي
أحمد ابراهيم أحمد

استاذنا الغالي الدكتور فوزي .. ماشاء الله عليك صاحب مواهب متعددة .. الله يعطيك العافية .. وفقكم الله وسدد خطاكم
سعدت جدا لزيارة وللمرة الأولى بقاعة الأدب الشعبي
وبالطبع يجب أن نرحب بالشاعر ذو الأحساس الشعبي الجميل .. الأستاذ الفاضل / أحمد إبراهيم
وسؤال له:
هل المناخ والجو الأدبي في مصر مهتم بالشعر والشاعر .. سواء من كتاب للشعر أو متذويقون ومتلقون له .. بالمقارنة بدول الخليج العربي؟! حيث أني أرى من وجه نظري الشخصية ومطالعتي للصحف والمجلات والمطبوعات العربية .. أجد اهتمام بالغ بالشعر والشعراء .. وحتى على مستوى المسابقات والجوائز الشعرية ؟؟
أسف للإطالة في السؤال وله أستفسار أيضا .. وذلك بحكم من غير ذى خبرة وغير موهب في الشعر ..
لكم منى خالص التحية

الأخ الكريم محمود سلامة
سعيد بتواجدك القيم اولا
واشكرك علي جميل كلماتك
وانا شاكر لك ماتفضلت به
الحقيقة وردا علي سؤالك لا
ولا كبيرة جدا
المناخ السائد حاليا في مصر ليس مشجع علي الاطلاق
والأدلة كثيرة
كم صفحة تنشر قصائد عامية مصرية؟
كم ندوة ادبية علي هامش معرض الكتاب لشعر العامية؟
كم برنامج شعري في الاذاعة او التليفزيون
وكلها بالطبع امور تهم كل مبدع وليس شاعرالعامية فقط
المناخ السائد الذي رفع راية لا لكل صوت يريد نطق كلمة الحق
أفسد بهجة مااراه من انتشار جيد وتنوع في شعر العامية
المناخ السائد الذي خصص عدة مهرجانات للتليفزيون وحفلاته
وللسينما الرديئة
لم يعطي حق الاهتمام بالشعر عامة وليس شعر العامية فقط
تحياتي اخي الكريم
وتقديري لك
أحمد ابراهيم احمد

¸.•°°·.¸.•°°·.¸¸.•

جئت لابارك هذا الحضور ... الرائع


كل الشكر للدكتور فوزي ابو دنيا ولجميع المشاركين

"
"
تقديري واحترامي

¸.•°°·.¸.•°°·.¸¸.•

*
*
*

تحية ورد

تسجيل حضور ..
وتسجيل اعجاب بما قرأته في قصيدة تسعة خمسة تسعة خمسة لمحمود موسى .. وضعت اصبعك على الجرح يا فنان .

السلام عليكم احييك يا استاذ فوزى على هذه الفكره الممتازه واشكرك على اهتمامك بمشاركتى معاكوا وانا اصغر شاعره معاكوا لك منى كل الاحترام والتقدير
الاولى

متحـــــــكمش بإعدامــــــــــــي

حبيبى بعدت ليه عنى؟!
دا قلبى داب ميتحملش تجرحنى
ميتحملش تدبحنى
وقلبى جوه بحر عنيك
غريق تايه
وبينادى عشان تسمع...متســـــــمعش
وبيعافر عشان يوصل .....مبوصلـــــش
وهمه زى موج بحرك
وبتمنى ف يوم يخلص....مبخلـــــــصش
وشايفك من بعيـــــــــيد واقف
وبتشاور يقول جايله
وراح تاخده.....وماجيــــــتش
وأحلامى اللى مخنوقه
عشان بعدك
عشان خاطرى متبعــــدش
مانيش عارفه انا اعمل ايه
بنام علشان مفكــرش
واصحى عشان ماحلمش
وبعدك عنى اعدامى
وهطلب قبل اعدامى
أشوفك بس لو مرة
وأتمنى تكون قاضى
وانت تنفذ الإعدام
ولو تقتل ...ولو تعدم
اكيد برده هتلقانى
ف أحلامك
وهتشوفنى ف نن عنيك
هتنطق اسمى ف كلامك
وانا عارفه انا وقلبى
بإنك مستـحـيــــــــــل تعدم
بإنك مسـتحيـــــــــــل تقتل
وده قلبى واقفلك بين حروف الحب
مابين الحـــــــ .... وبين الـ ب
بيترجـــــــاك..... متظلمنيش
متبعدش...وتقتلنى
متحكمـــــــــــش بإعدامــــى



الثانيه

كــــرامــــــة عـــربــــي

ليه فى بلادنا الدنيا تدور
منتاش عارف
فين الحق وفين الزور
حقه الحق أن أنت تسلم
تهدم بيتك حتى .... بإيدك
وادي حرامى سارق خيرك
حابس صوتك ماسك أيدك
ممنوع حتى انك تتكلم
مطلوب منك
لما تقابلة في شارع ... سلم
اكل أكلك
طالع واكل نازل واكل
دنس رمل الأرض الطاهرة
ضاعت أرضك .... يادى الوقعة
امتى ياعربى هتنقذ بلدك
تصرخ لا أنا هتكلم
واللى عامللّى فيها معلم
راح يتعلم
ان كرامة إنسان عربي
مش راح تسمح أنة يسلم
راح يتكلم
راح يتكلم


الثالثه


قمرى أنا ميـــــــــن نجمته؟!

قلب القمر مفتوح لكل نجوم سماه
لكنه برده إختارله نجمه منهم
تبقى ف هواه
إختارله شمس عشان تنور دنيته
تدّيله حب تكونله ضيّه وفرحته
شوف القمر...شوف فرحته
لمّا يقبلها مره قبل المغربيه
كان يشوفها وكله لهفه وشوق لها
وعينه مليانه بدموع
يجرى عليها يقلّها
اهـــــــــلا حبيبتى
إنتى فينك من زمان
كانت تبص بعينها ليه
من كتر شوقها..... عنييها تنطق
يا حبيبى وحشتنى
جيتلك خلاص
وبكل رقه ....كانت تنشّف دمعته
كانت تصالحه
لمّا نورها ينتقل على قلبه
كانت بتدّيله الحنان
طب يا ترى قمرى أنا
مين نجمته؟!
مين شمسه ....اللّى بتمسح دمعته
عارفه الجواب انه أنا
لكنّى برده
أتنمنى إنى اسمعها منه
أتمنى انى اكون لقلبه
زى نجمه للقمر
بتمنى يسهر باللّيالى
بتمنى يشغل عقله بيّه
وأكون معاه
واكون ف باله وف خياله
وف هواه
بتمنى انه يقوللى كلمه
زى القمر ما يقول لشمسه
انتى اللّى قلبى حبها
واتمنى انه يكون لها
ويروحلها ويقولها
انتى فينك من زمان
انتى شمسى وانتى ضيّى
وعشانك انتى...
راح انور ف السما
وعشانك انتى...
راح أبان
هأفضل احبك طول حياتى
وحتى بعد ما اموت كمان
خليكى جنبى يا حبيبتى
حبك ف قلبى مش هيخلص
من هنا لآخر الزمان

تعلن قاعه الادب الشعبى عن بداء ندوة شعرية بين اعضاء قاعة الادب الشعبى. كل عضو مسموح له الاشتراك بعمل او اثنين على اكثر تقدير
يقوم بنشرهم هنا تحت هذا الموضوع
الندوة لمدة اسبوع ستقوم خلالها لجنة مكونة من خمسة نقاد يتم ترشيحهم من قبل ادارة الملتقى بتقيم الاعمال المقدمة بحيادية تامة واختيار افضل ثلاثة اعمال نشرت فى خلال هذه الندوة وهى كالاتى:-
المركز الاول
المركز الثانى
المركز الثالث
والفائزين الثلاثة سوف يحصلون على شهادات تقدير باسم ملتقى الواحة.
تمنياتى لكم بندوة سعيدة والفوز للجميع

السلام عليكم ورحمة الله وبركاته
الحبيب د. فوزى ابو دنيا
اشكرك على دعوتك الكريمه ويشرفنى المشاركه فى ندوتكم الراقيه
باثنين من كتاباتى

كان زمان
احنا ليه بنلوم زمان ..
أومكان ؟
ماحنا صُناع كل شىء
يبقى عيب يا ضعفنا
ترتدى زى البرىء
تفتتح للتوهه فينا
الف ميت مليون طريق
شماعات على شماعات
صنّعوها هايله خالص
لاستكانات السكات
والعجب سِكن الملامح..
والشفايف
مررتها المصمصات
واللى جى بينعى بخته
رغم إن شبيهُه فات
كان وكُنا
غرقتنا ف دومات
وإهنا فى الاصل اللى هُنّا
لما هان على دمنا
كل برعم فينا مات
وارتضينا بنفسنا
نشرب الذل ف كاسات
من صناعة ضعفنا
اللى اقرب م الممات
توهه حتى جوه ذاتنا
باللى صاير واللى كان
إمتى بس هتنمحى من مفرداتنا
كلمه بنرددها ديماً
كان زمااااااااااان

سِكْت الكلام
طب ليه بنسكت لما نحتاج للكلام؟
عشان كهوف الخوف بتحبس جوه جواها الامل
ومفيش حقيقه فيها معنى بيكتمل
الخوف يضيع كل شىء
بيفطس الحلم البرىء
قبلن ما حتى نحلمه
ونفوق على الهم التقيل
ايه اللى مفروض نعمله؟؟؟
نتلاقى يوم من غير ميعاد!!!
يا قسوة الليل اللى لابس كل يوم
توب من سواد
رغم انه ما فاتشى كتير على بعدنا
بلقاكى صوت عصفور بيحلم
كل تغريده غُنا
من كتر ما زاد احتياجى لضمته
جريت عليه
مديت ايديا لا التقيت حضنه الوفى
ولا حتى نظره كات ف يوم بتهزنى
ف حنان عنيه
فسألت نفسى بكل حسره
ازاى وليه؟؟
دا الحلم كان فارد جناحه ع المدى
وكنتى صوتى اللى بيصرخ
لما بيضعف صوتى ويضيع الصدى
وكنتى انتى المنتهى والمبتدا
وكنت اشوف فيكى صلابة كلمتى
تقوليلى اوعى الانهزام
اوعاك تخاف
اوعاك يا ضى العين تئن
اياك تخاف
او لحظه تضعف او تحن
هنكلها حتى ان شا الله حاف
وكفايه تبقى انت اميرى ودنيتى
غمضت عينى يا زمان الامنيات
ولا كنتش اعرف قد ايه انك غريب
واللى اتولد جواك ف لحظه ضاع ومات
كدابه يا كلمة حبيب
كدابه يا لحظة امل
كداب يا معنى نفسى اشوفك مكتمل
سكت الكلام

استاذى واخى العزيز ابو دنيا
سعدت بدعوتك الجميلة فى هذا الملتقى الادبى الحافل بالمواهب والاساتذة
وسأشارك معكم بقصيدتين ...واتمنى ان تحوز على اعجاب اخوانى وزملائى فى هذا الصرح

القصيدة الاولى

تايهة ياخطوتنا فى متاهة

سؤال وحاير بين قلوبنا التايهة
وسط الهـمـهـمة
فين حسها ؟؟؟؟؟؟؟
وليه حروفنا عاللسان
مكسورة تايهة متهتهة
وليه زيوف الكلمة فينا
فاتحة بيبانها مفندقة
تايهة يا خطوتنا فى متاهة ...
رسموها لينا بمسطرة
مرسومة فيها الف دايرة
لكن دواير مغلقة
دايرين نلف حولين جروحنا
ونرقص على صوت اهرها
صرخت قلوبنا جوة منا
تعبها كتر الهسهسة
فتحولنا بوابة مواربة
جريت خطاوى حلمنا
نداهة سحبتنا فى طريق
فيه الف شمس منورة
لكنهم ...طلعوا نجوم
نيران لهيبها ...عَمِتْ قمرها
دخانها توه شمسها
خاف منها حتى المطر
رفض يسيب كل الغيوم الساكنة فوق ضهر البشر
وكتافنا محنية بسؤال
نمشى ندور عالنهار
ولا نستنى القمر???
نمشى ندور
عالنهار
ولا
نستنى القمر

___________

القصيدة الثانية
ومتمدن صحيح لكن
ومتمدن صحيح لكن ...بارفض كل حرية
تعبر عنى بلسانى .. وتدى الحق للتانى
يخلى نفسه فى مكانى
ويتكلم بمفهومه
ولما اصرخ واقول لأه
يكتف صوتى بعيونه
فاتهجى الكلام تانى
ويولد صوتى مية صرخة
تنور فى الضلام شمعة
فاتحسس على ضؤها
لعلى اشوف صدى صوتى
لعل سكوتى يتلعثم
وينطق بالكلام تانى
فالقانى
واحرر صوتى من سجنه
اللى عاش راضى بسجانه
ويهرب صوتى يتشعلق
على شفايفى ويتعلق
ويملانى
يزق الكلمة بالعافية عشان تخرج
وتنعانى
فاستنى واتمنى
لو اصرخ فى الفضا صرخة
ترجع له النهار تانى
لو اصرخ فى السكون صرخة
ترجعله الكلام تانى
واتمنى
لو امسك راية الكلمة
والف بيها جوا الناس
فتسرى الكلمة فى الشرايين
ينضف دمها الاحساس
فتطلع صافية لون الحق
تقول لأ
ولو حتى على الكراس

وابص ورايا واتعجب
دانا لوحدى !!!!!!ماشى فى الطريق وحدى
بصرخ لجل كل الناس
لكن فايتنى اروح وحدى
غريب جدا.....
برغم ان الطريق فاضى
لكن ماشيين هناك زحمة
زحمة فوق رصيف الأهرة
بينادوا على احلامهم
لسان حالهم
بينهانى وبينادى
بلاش ارجع!!!!!!!!!
فاخاف جدا
واجرى عالرصيف جارهم
واغمى عينيا بايديا
والف الساقية فى عيونهم
واعمى ودانى
واعمى ودانى عشان ما اسمع
وايه يمنع
معادش من الحواس غيرها
عشان تخضع
غريبة دنية الانسان
كتب عقده زمان فيها على الشورى
على الحرية عالاحسان
لكن اهين من النسيان
مسح عقده اللى كان حافظه
رضيله عيشة الطغيان

شكراً لك / د. فوزى أبو دنيا
على دعوتى للمشاركة فى هذه المسابقة الشعرية الشعبية الحميمة .
ونظراً لطول المشاركة التى أنوى المشاركة بها ، فقد فضلت أن أشارك بـ :- " ثلاثيات ورباعيات سامح الشبة " بأكملها بوجودها على هذا الرابط :-
https://www.rabitat-alwaha.net/molta...ad.php?t=15647
تحياتى وتقديرى .

دايما يحط ايديه علي اكتافي

ويقوللي دايما عيش عشان غيرك

ولما الزمن خرب علينا العيشة

كان دايما ابويا يبكي عشان غيره يفرفش

مايقدرش .. اصلوا راجل مخلوق عشان يعيش لغيره

\

اعتذر
لسادة الشعر ... فقهاء المشاعر النقية

لتطفلي بينهم


اجعلوني على خزائن ودكم ومحبتكم ... وانا لحرفكم .. خليلا

\

سأتابع هذه الروائع

يسعدنا ان نقدم لكم شاعر كبير ومثقف

الاسم: أسامة عصام صلاح الدين البيلى

الميلاد : 15/10/1982
الجنسية : مصرى
محل الاقامة: الرياض - المملكة العربية السعودية
حاصل على:
(1) درجة الليسانس فى اللغة الإنجليزية وآدابها.
(2) اجتزت السنة التمهيدية للماجستير - شعبة أدب.
أعمل مدرس لغة إنجليزية للبالغين. (أدرس دبلومة فى اللغة الإنجليزية)
مستنى جزوة الشعر وأنا فى العام الثالث من دراستى الجامعية.
أكتب بالعامية المصرية ، ولى محاولات فى القصة القصيرة والنقد الأدبى.
نُشرت دراسة عن مخطوط ديوانى "ملامحى" - مع آخرين - فى مؤتمر الشعر الرابع بديرب نجم عام 2004 (كتبها أ/سمير الفيل)
أسامة البيلى