لقد نشرتها في صفحته، وأنا آسف لأنني أعيد نشرها.. إنها ارتجالية بحتة وقت أن قرأت قصيدة أخي العزيز أسامة عصام البيلي في هذ الرابط
https://www.rabitat-alwaha.net/molta...857#post165857
مع العلم أنا كنت ثالث الصحبة.. وهكذا الأيام دواليك
آه يا صاحبي
لسه فاكر؟!
فضّي صدرك يا حبيبي شوية من همه
وريح لو دقيقة
الحياة صعبة ومعاندة..
أصلنا اعتدنا على هذي الطريقة
مهما تدّي الدنيا جاحدة
والمباهج تحت سيف الحزن ساجدة
أيوه يا صاحبي الغريب
نبضي سامعك..
سامع الضحكة ف شفايفك
سامع الدمعة ف عيونك
سامع الشانز وكلامه
وابتسامك يا أسامة وابتسامه
زي ما يكون من قريب
كلنا ضعنا يا صاحب
إنت في غربة ملامحك عن ملامح مين هناك
واحنا ف بْلادنا أجانب
كلنا حسرة وْبلاوي وانهتاك
يا أسامة ؟؟!!!
عارف اللقمة اللي إيدي بتعاملها
مش بتاعتي
عارف البدلة اللي كان نفسي اشتريها
اشتراها إبن جارتي
عارف الضحكة اللي كبرت في عيون بنت الجيران
أما كنت أحكي لعيونك عنها في نشوة ملامحي
جا عريس ليها وخطبها
لو ف مرة شفتها بتنشر غسيلهم..
أو ف مرة في زحام الشارع المصري اتقابلنا
بابقى اشوف ف عنيها ضلمة
أنت متْصور يا صاحبي!!؟؟؟؟؟؟
ابتسام الحب سابها!!!!
برده جايز!؟
أيو يا صاحبي ورب الكون صحيح
كل قلب اليوم في حارتنا جريح
إبتسام الدنيا سابنا
آاااااااااااااااااااااااا ااااه
يا صاحبي
لسه فاكر يا حبيبي الله يسامحك
لقمة العيش فْ بلدنا عششت في القلب
حتى غلوشت صورة ملامحك
يا صديقي
فضي صدرك من همومه
خرّج القلب الحنيّن من مكانه
واوعى تاني تفتكرنا
انسى كل الدنيا حتى كل مرة فيها يا صاحبي اتقابلنا
أنسى سالم وابن سالم
إنسى صاحبنا محمد وانسى بدر بدير
وسالم
سالم الدنيا الغبية
لاجل ماتعيش يا حبيبي
في رضا الدنيا شوية
بص يا صاحبي هناك!!
شايف الضحكة ف طريقي؟؟
ألف دكتور جالها بعدك
بعد ما سلّمت للطيارة نفسك
قالوا دا عنده اكتئاب
أنت عارف..
المصيبة الوقتي في مصر العزيزة
مش مصيبة الاكتئاب
ولاّ مشكلة المرض
المصيبة أن ممعاكشي الفلوس اللي تداوي
لأجل هذا
يا صديقي في حشايا الاغتراب
أوعى تقضيها غناوي
واوعى يا صاحبي برغم الحب بينا
تفتكرنا
إنسي كل اللي ما بينّا
ويكأنه كان مفيش
لو فاكرني بْجد أو فاكر محمد
إنسى يا صاحبي وشوشنا
لاجل تقدر يوم تعيش
أنا آسف لأي أخطاء.. وأكرر أنها ارتجالية وليدة ما يقرب من خمس دقايق
على رأي الشاعر العبقري محمد إبراهيم الحريري كيبوردية سريعة