لسا فاضلك ضحكتين
الأولى ":
بسمة بنطبع فوق الوشوش
والتانية !
بعيدة جدأ ع الوضوح
لسا فاضلك ركعتين
وحروف بتنهش فـ الصور
فأركع ودمع يا ولا
واهجر بصوتك فـ الورا
راجع اوام لاله رحيم ....
القطر عكز ع القضيب
والناس قتلها الانتظار
القطر منهك يا ولا
بس الأكيد ... فرجه قريب
نداهة ندهت للصبى
كشفت جمالها فانتشا
طلبت جماله فاختشا
مشتاق لقاكم يا نبى
مشتاق لريح الزعفران
مشتاق لجولة فـ المكان
عشمـى تحقق مطلبى ....
الترعة غنت للرصيف
موال قديم لكنه حر
الجرح مر
اوعاك تعاتب فى التراب
علشان مبوظ منظرك
شايلك سنين فوق كتافه
ولا عمره مره يكدرك
فأزاى يا ولدى يوم عجافه
شاطب جمايله من دفترك ..!!!
مجذوب وماشى بالبخور
فـ الدرب الاحمر والحسين
صحيت سعاد وقت السحور
سمعت دعاء قالت امين
والحى جنة وبنت حور
الليلة قدر يا مسلمين
يا بخت من قاد الفانوس
علشـان يمر العابرين
.............
بقلم / احمـد عبد الفتاح الشهيبى
15/9 2:00 مساء