قصاقيص ورق متبعترين
على ارض ايام الغرق
فيهم حكاوى
المجروحين
حزن وانين
على باب عذابك ياسنين
وسهم عدى ف الضمير
واما مرق.....
بركان غضب
فيا اتنفض
وطريق طويل
وف اخره ليل
وكلام كتير مابين وبين
وغيم كائيب مالى السحاب
ومضلمة فوقنا السما
ودمعة حايرة جوه عين
احزان كتير بتضمنا
وتلمنا قصاقيص ورق
**************
قلبى اللى شابى ع الشراقى
ومعادشى لاقى
عطشان للحظه من حنين
وصبرى سرسبته انين
فعيون غربالك ياسنين
مقدرش يجى يلمنى
و يشدنى
لبر الامان
ودموع طوفان
ماليه البراح
وبحر عادم ميته
الملح فيه بيموته
وريقنا ناشف م العطش
وقلب وافى لكن حزين
على دمع عين المجروحين
اه من عذابك ياسنين
لما نلم ف عمرنا
يضيع مننا
قصاقيص ورق
*************
حروف كلامنا
بعتروه
حروف حزينه ودبلانين
وبيحرقوه
ويقولو دى اصل الفتن
وبان دا كلام جبان
وبانه خان
وبانه بايعك ياوطن
والف شاهد يسنده
وياكده بان هراء
وانه لعنه وانه داق
وانه كان اصل الفراق......
ما بين الشمس والقمر
و زعل الليل م النهار
هواللى خلى الحب...
.............م الكره غار... (غيرة)
ويفتحوله ميت كرار
والف غار..... (مغارة)
كل الشموع
ساعتها دغرى تنطفى
ويعلقو ميت مشنقة
ويدقه له مليون صليب
ويقوله فيه مليون دليل
على انه خان
وانه كان
ف الدنيا اكبر العبان
ويبقى جوه كل قلب محرقة
والف صوت لما اتزنق
تلقاه زعق
ارجوكو قبل ماتحرقوه
خلوه كما
قصاقيص ورق