( عايز معجزات )
عايز لقصرك في سماكي **** أركب براق
لاحسن ده عمري معْ هواكي *** داخلين سباق
ويا دوبك أوصل يا ملاكي *** وانوي الفراق
عايز براق
***
وازاي راح اقدر أقطفك *** والعمر ذ ُل
ياخد وبعد ما يوعدَك *** يجري يفل
***
عايز لبرِّك والنَّجا *** سفينة نوح
يمكن يلاقيني الرَّجا *** في الغيم يلوح
***
واخد معايا في صحبتي *** شوق الحنين
وده كل زادي في غربتي *** طول السنين
***
عايز لظهري اللي انحنى *** عصا موسى
عايز لروح تاهت هنا *** شفا عيسى
***
عايز وعايز معجزات *** زعلا ن على العمر اللي فات
خايف على بكره اللي آت
***
بصِّت لي بنتي وقرَّبت *** على كتفي قامت طبطبت
وخدتني من إيدي البُنيّه *** شاورت لي ع الشمس اللي جيَّه
مسحت لي دمعاتي ، وقالت لي :
بابا انت طيب
واللي جاي بكره قريب
خليك شويه
واللي ما تقدر عليه
أنا بردو هيه !!
هيه اللي قامت في الجزاير *** ولا فاكر يوم يناير ؟ !
أنا بردو هيه
هيه اللي شالت ولدها *** يوم دير ياسين
دفنت ضناها بيدَّها *** لاجل اليمين
حالفه لَتِحمي أرضها *** بدماها هتصون عرضها
***
هيه دي يا ابا الحكايه *** واحنا بكره والبدايه
قوم يا بابا... قوم يا بابا هات لي طرحة *** زَيِّن ِ الفستان بفرحة
بكره جاي
طالب القُرب افتحوا له *** افتحوا له الباب ويا لا زغرطوله
الليه ليلة حنتي .. وبكره طبعا دخلتي
دخلة حبيبة ع اللي طالب حُبها
***
شوفت يا ابا إن الزمن ده للبنات *** ولا لسه ـ يا حبيبي ـ لسه عايز معجزات
قوم معايا .. قوم معايا نكمِّل المشوار بجد *** هات معانا .. هات معانا في إيدينا كل مولود اتولد
ارفعونا هيله بيله ... نبتدي والكل عيله
ارفعونا لاجل نور الشمس يحضن و ِشِّنا *** احنا نَـبْــته عايزه شمس الكون تغرق أرضنا
***
حط إيدك ع النزيف ... خيط الجرح اللي غطاه الخريف
***
شوفت يا ابا ان الزمن ده للبنات *** ولا لسه يا حبيبي لسه عايز معجزات
بقلم الشاعر / محمد محمود شعبان ( حمادة )
مصر ـ الزقازيق ـ محافظة الشرقية