باحسه أغلى اصحابى
بيبعد لما أقول دا نسينى ..يرجع تانى ويزورنى
كأن الغنوة دى ليه يا شيخ سيد .. وعلشانه
" زورونى كل سنه مره .. حرام تنسونى بالمره "
فى كل زياره أنا دايما باقولهاله ..
.. وألمح ضحكه فى عيونه
يا شيخ رمضان .. يا أطيب حد أنا عرفته
ما تنسانيش .. يا ريت لو تيجى كام مره
طب أعمل ايه .. بتوحشنى
بحس انى معاك بأرجع برىء تانى
وأعيش الدنيا ع الفطره
بحبك لما تحضنى فى صلاة الفجر
برقة نسمة الصبحية ..تندهلى
ونطلع كل يوم رحله
نسافر جوا أحلى ما فينا نتنقل
ما بين تسبيحه والتانية
وزادنا فى الطريق مصحف
بنشرب منه ريح الجنه..
.. ناكل شهد م التوبه
وننهى الرحله بالتراويح
نريح لجل نستنى سفر تانى
أقولك سر..
زمان فى الرحله كنت اتعب
واتسحب عشان اخطف لى كام لقمة
وأوقات تانية كنت انسى
وكنت أضحك على نفسى قوى وأبكى
عشان عارف بإن معاك مفيش أسرار
بتعرف بس بتسامح
فاكرها كأنها امبارح
فى أول مره كملت الطريق وياك
ومن يومها عشقت الرحله وانا فى ايديك
بنتحرك ..ما بين الفجر وغروبه
..نعدى الشارع الممدود .. ما بين الفرقة والجنه
وأقولك سر تانى كمان
ف كل زياره انا بازعل
بتبقى ضيف يا سيدنا .. لكن دايما تضايفنا
ودايما جاى ومحمل بخير ياما
وما بنقدر نقوم وياك بواجب صح
ومين يكرم أبو الأكرام
تصدق انى حتى بخاف ..اقولك زورنى كام مره
ليتقال ان أنا طمعان ..فى احمال الهدايا اللى جايبهالى
خلاص عارف ما تزعلشى
بإن زيارة الغاليين ..يدوبك فى السنة مره
لكن فوت يا سى رمضان ..
أهى كلمة تصبرنى على بعادك
ما هو انت يدوب بتيجى شوية وتفارق
لكن بالله أمانه عليك ..
وقبل ما تمشى وتفوتنا
ما تنسانى بدعاء منك
بإنى أقدر على الفرقة
واعيش اتقوّى بالزكرى
وأمنتك سلام للى كتير بيسافروا ويانا
ومستنيك عشان تيجى السنة الجاية
تزورنى فى السنة مرة